Bees brasato met porcini-sampioene
14 Junie
Braai
3
Hier is die resep vir Bees brasato met porcini-sampioene, soos gesien op Toks en Tjops.
Bestanddele
75 g Porcini sampioene gedroog
350 ml Rooiwyn
2.5 - 3 kg Heel bees-rib-eye van die been afgesny
125 g Bacon in blokkies gesny
3 Rooi uie
3 Wortels
3 Seldery stokke fyngekap
6 Knoffel tone fyn
2 blikke Italiaanse tamaties gekap
4 - 5 koppies Hoenderaftreksel
Six gun Speserye vir smaak
Sout vir smaak
Peper vir smaak
Olyfolie
’n Knippie fyn naeltjies
3 Lourierblare
4 blokkies Bitter sjokolade verkieslik met ’n 80% kakao-inhoud
Metode
- In die kombuis in ‘n pan bring die rooiwyn tot kookpunt en voeg dan die sampioene daarin. Laat dit van die hitte af staan en week vir 5 minute, waarna jy die sampioene uitskep en versnipper. Hou die wyn!
- Berei ‘n braai voor vir direkte kook en plaas ‘n potjie pot oor die kole. Vryf ’n lagie olyfolie oor die vleis en geur dit dan mildelik met sout en peper. Verbruin dit nou deeglik in die potjie. Verwyder die vleis en draai die hitte af na medium. Braai nou die bacon blokkies, wortels, uie, seldery en die fyn knoffel vir sowat 10 minute totdat die groente sag raak.
- Skep die vleis terug in die pot en skink die rooiwyn waarin die porcini geweek het bo-oor. Voeg die tamaties en die hoenderaftreksel by, en maak seker dat die vloeistof minstens die helfte van die vleis bedek.
- Strooi die knippie fyn naeltjies oor die vloeistof en voeg die lourierblare by. Maak seker die pot se deksel seël dig en kook dit dan vir 3 tot 3½ ure. Haal van die hitte af en laat die pot vir sowat 15 minute rus; skep die vleis dan uit en rasper die sjokolade blokkies oor die sous.
- Geur met Six Gun Speserye, sout en peper na smaak, waarna jy dit met ’n handmenger of jou voedselverwerker tot ’n puree verwerk. Sny die vleis versigtig in 5 mm dik skywe, skep dit terug in die pot en laat dit oor ’n lae hitte net weer deeglik warm word.
- Sit dit voor.