Op Maandag, 8 Oktober, sal die rocker Francois van Coke ook TV-aanbieder op sy CV kan sit wanneer die eerste episode van sy nuwe TV-program op kykNET (DStv-kanaal 144) uitgesaai word.

Die Van Coke Show is ’n nuwe speletjies- en geselsprogram waar almal kliphard speel om niks te wen nie. Saam met bekendes en komediante gaan Francois die draak steek met al die malligheid wat in die wêreld aangaan.

Francois is in 2017 genader deur C-Saw Produksies om ’n televisieprogram vir kykNET te skep. Die formaat van die speletjiesprogram is ontwikkel rondom Francois se passies en belangstellings. Die program sluit dus natuurlik ook ’n musikale element in.

Elke week sal spanne teen mekaar meeding in vinnige vraag-en-antwoordsessies en ook lekker skerts oor musiekvideo’s op daardie vreemde ding wat ons die internet noem.

Van Coke word elke week bygestaan deur spankapteine soos Cindy Swanepoel (Binnelanders), Jonathan (Radio Raps), Solomon Cupido (Mense Mense), Beer Adriaanse (Hotel, Fynskrif) en Quanita Adams (Sara se Geheim).

Van sy ou Fokofpolisiekar-kamerade is deel van die nuwe TV-avontuur. Hunter Kennedy en Wynand Myburgh sal agter die skerms saam met die vervaardiger Liebie Opperman en die regisseur Gerrit Joubert werk om vir die volgende dertien weke die blou uit elke Maandag te haal.

Die Van Coke Show is vanaf Maandag, 8 Oktober om 20:30 op kykNET (DStv-kanaal 144) te sien.