“Ek is so bly om terug op die lug te wees. Ek het dit vreeslik gemis om die area se stories vas te vang en al die mooi plekke met ons kykers te deel. Ek moes weer gewoond raak aan al die kamera’s, maar ek het vinnig weer my ritme gevind,” vertel Anzél.
In dié seisoen maak Anzél onder meer ’n draai by Fuselage Wines waar sy ’n vliegtuig loods saam met die Protea-vlieënier Alewyn Burger. “Dit was rêrig ’n uitsonderlike geleentheid. Die kameraspan het hierdie spesiale ondervinding ongelooflik mooi vasgevang, en ons het sommer besluit om die seisoen met dié episode af te skop,” sê sy opgewonde.
Anzél en die span maak ook ’n draai by Boschendal, die tweede oudste wynplaas in die Wynlande. Daar leer hulle bietjie meer oor herlewingsboerdery, en hulle bly oor by die nuwe toeriste-aantreklikheid Camp Canoe.
Kykers kan ook uitsien na ’n kuiertjie op Doolhof buite Wellington. Anzél vlieg met ’n helikopter na dié pragtige wynlandgoed, net onder die Bainskloof-pas, waar hulle heerlike wyne proe, lekker kos geniet en elektriese fietse ry.
“Wat ’n ongelooflike ervaring! Ons het ook met Karen Zoid gekuier,” sê Anzél. “Haar wyn ‘Sy Raas’ word op Doolhoof gemaak, en ons het gesels oor dinge waaroor sy nog nie voorheen op TV gepraat het nie: haar professoraat, die verlies van haar ma en hoe om ’n goeie ma te wees. Beslis ’n kant van haar wat mens nie aldag sien nie.”
Anzél besoek ook plekke soos Groote Post langs die Weskus, Benguela Cove buite Hermanus, Meerlust buite Stellenbosch en GlenWood Vineyards in Franschhoek.
“Die vierde seisoen van Anzél in die Boland is sonder twyfel die mees diverse seisoen nog. Nadat ek swanger was, het ek besef die Boland het baie om te bied buiten wyn. Ek wil ook hierdie verskillende trekpleisters met die kykers deel.”
Anzél in die Boland word geborg deur Paarl Valleij Lifestyle Estate & Farm.
Anzél in die Boland begin op 5 Julie 2024 om 18:30 net op kykNET (DStv-kanaal 144). Die reeks sal ook op DStv Stream en Catch Up beskikbaar wees.