Wees gewaarsku, as jy nog nie vantevore lus gehad het om die wêreld op twee wiele te takel nie, gaan hierdie reeks op kykNET jou beslis ander idees gee! Daar gaan by verafgeleë en onbekende plekke ingeloer word wat so deel is van die Suid-Afrikaanse landskap as ’n boer met ’n bakkie.
Vir die drie manne op hul avontuurmotorfietse kan die grondpad nie gou genoeg kom nie. Of uitdagend genoeg wees nie. Hierdie reeks gaan jou motiveer, jou inspireer en jou met nuwe oë na motorfietsryers laat kyk. Kort voor lank mag jy dalk self een wees!
1 Spoor Avonture is die breinkind van André de Villiers, oftewel Andre4x4, die reisende onderwyser Franswa Smit en die man met die praktiese oplossings en planne, Hans Strydom.
Daar is ook nie net ’n enkele handelsmerk-avontuurmotorfiets wat aan die strawwe ritte onderwerp word nie. Elkeen van die drie het hul eie voorkeur vir twee wiele.
André, afkomstig van Wellington in die Boland, takel gereeld die grondpad op sy Harley Davidson Pan America Adventure-motorfiets wat hy My 2x1 noem. Grondpadryers het hom heel waarskynlik al verskeie kere met sy kenmerkende oranje valhelm gewaar . . .
Op sy beurt bevind Franswa, stigter van MyBike Adventures & Touring (MBAT) en Motor Cycle Camping South Africa, hom op sy BMW GS 1200 genaamd Vasco. Deur sy avontuurmotorfietstoere het hy die afgelope drie jaar daartoe bygedra dat afgeleë plekke ook finansieel daarby baat vind.
Hans, mede-eienaar van MyBike Adventures & Touring (MBAT) se voorkeur-avontuurmotorfiets is die Honda Africa Twin. Net soos die ander twee, het sy motorfiets ook ’n naam, heel gepas Ratel. Boonop is Hans aan die hoof van verskeie Facebook-profiele wat oor motorfietse handel, waaronder die South African Honda Africa Twin-, die Honda CRF100- en die 1100L South Africa-groep.
“Daar is ’n sekere bekoring in die vryheid om die grondpad op ’n motorfiets aan te durf. Die gebrul van die enjin onder jou, die ongerepte natuurskoon wat jy bereik, die kameraderie van ’n groep ryers wat saam ontdek, die impulsiewe roetes wat gevind word – dit is die rede vir ons 1 Spoor Avontuur,” sê André.
Maar onthou, dis nie net ’n kwessie van ’n avontuurmotorfiets koop en daar trek jy dat die stof so staan nie. Nee, dit verg finesse, avontuurlus en baie beslis die raad van kundiges voordat jy die grondpad op twee wiele takel.
“Dit is belangrik om die regte veiligheidstoerusting aan te skaf en beslis ’n kursus te deurloop waar hulle jou leer hoe om jou fiets te hanteer,” is André se wyse raad.
Een van die belangrikste dinge om altyd in gedagte te hou, is die Engelse uitdrukking: ATGATT. Dit staan vir “All the gear, all the time”. Bly liewer ’n toeskouer as ’n deelnemer as jy hierdie raad ignoreer.
André, Franswa en Hans is ook meer as bereid om voornemende ryers advies te gee met wat aangeskaf moet word. En tussendeur gee André ook raad vir die pad vorentoe wanneer jy lus is om jou motorfiets-stewels aan te trek.
“Dit verg goeie beplanning om te weet waarheen jy beoog om te ry en die mense naaste aan jou te laat weet van jou planne, veral as jy die onbekende invaar waar daar nie noodwendig selfoonseine is nie. Ten minste het hulle dan ’n idee waar om na jou te soek sou iets met jou gebeur.
“Beplan ook wat jy gaan saam met jou gaan neem. Jy wil graag so lig as moontlik pak, anders is die fiets te swaar en gaan jy sukkel. Dit kan in ’n slegte ervaring ontaard.
“Laaste, maar nie die minste nie, geniet die vryheid en die ongerepte natuur, want dis ongelooflik lekker om dit op ’n motorfiets te ervaar.”
1 Spoor Avonture word vanaf Maandagaand 7 Oktober vanaf 17:30 op kykNET (DStv-kanaal 144) uitgesaai.